ភ្នំពេញ៖ អភិបាលខេត្តតាកែវបញ្ចាក់ថារូបសំណាកពងទា និងបង្កង កំពុងស្វែងរកទីតាំងសមស្របមួយនិងដើម្បីបង្ហាញអំពីសក្ដានុពលរបស់ខេត្តដែលហៅថា ភូមិមួយ ផលិតផលមួយ ខណៈរូបសំណាកព្រះនរាយណ៍ជានិមិត្តរូបតំណាងខេត្តតាកែវដដែរ។

ថ្លែងក្នុងសន្និសីទសារព័ត៌មានរបស់អង្គភាពអ្នកនាំពាក្យរាជរដ្ឋាភិបាល ស្ដីពី «ភាពជោគជ័យរយៈពេល ៥ឆ្នាំ របស់ខេត្តតាកែវ» នៅថ្ងៃទី២ ខែមិនា ឆ្នាំ២០២៣ អភិបាលខេត្តតាកែវ លោក អ៊ូច ភា បញ្ជាក់ថាគម្រោងសាងសង់រូបសំណាកបង្កង និងពងទានោះគឺចង់បង្ហាញពីសក្ដានុពលនៃផលិតផលរបស់ខេត្តតាកែវ។

លោកបានលើកឡើងថា ក្រោយស្ទង់មតិនៅតាមបណ្ដាញសង្គមតាមរយៈរូបភាព 3D រង្វង់មូលបង្កង និងពងទាលើបណ្តាញសង្គម មានប្រជាពលរដ្ឋមួយចំនួនគាំទ្រ និងមួយចំនួនទៀត មិនគាំទ្រដោយលោកអះអាងថារូបសំណាកនេះ មិនមែនបង្ហាញនិមិត្ដរូបរបស់ខេត្តនោះទេ តែគឺបង្ហាញអំពីសក្ដានុពលរបស់ខេត្តដូច «ភូមិមួយ ផលិតផលមួយ»។

លោកថា៖ «និមិត្ដរូបខេត្តរបស់យើង គឺ ព្រះនរាយណ៍ អ្វីដែលយើងធ្វើរូបបង្កង ឬពងទានេះ បង្ហាញអំពីសក្ដានុពលរបស់ខេត្ត យើងហៅថាដូចភូមិមួយ ផលិតផលមួយអញ្ចឹង»។

អភិបាលខេត្តតាកែវបញ្ចាក់ថា ដោយសារតែវិបត្តិជំងឺកូវីដ-១៩ ទើបមានការរាំងស្ទះចំពោះគម្រោងសាងសង់រូបសំណាកទាំង២នេះ ប៉ុន្ដែរដ្ឋបាលខេត្តនឹងខិតខំរកទីតាំងសមស្រប ដើម្បីទេសចរដែលមកកម្សាន្ដ ឬទស្សនាខេត្តតាកែវ នឹកឃើញបង្កង និងពងទាកូនពេលមកដល់ទឹកដីខេត្តតាកែវនេះ៕